Gary Neville hefur viðurkennt að hann væri ekki mótfallinn því að Ole Gunnar Solskjær snúi aftur til starfa hjá Manchester United sem bráðabirgðastjóri, þrátt fyrir að það minni á „Groundhog Day“.

Solskjær er einn þeirra kosta sem United eru að skoða eftir að Ruben Amorim var rekinn úr starfi í vikunni. Þetta er athyglisvert í ljósi þess að Norðmaðurinn var sjálfur látinn fara úr starfi knattspyrnustjóra félagsins árið 2021. Samkvæmt Daily Mail Sport stendur baráttan nú á milli Solskjærs og Michael Carrick um tímabundið starf.

Neville ræddi málið í viðtali við Sky Sports fyrir leik United gegn Burnley. Hann sagði að hann myndi ekki standa gegn endurkomu Solskjærs og benti á að United hefði verið fast í ákveðinni hringrás síðustu 12 ár, svipað og Liverpool upplifði um langt skeið.

Neville lagði áherslu á að Solskjær elski félagið, þekki starfið og hafi reynslu af því. Hann nefndi einnig Carrick og Ruud van Nistelrooy sem sterka kosti, menn sem þekki Manchester United vel og beri mikla ást til félagsins.