Ungur knattspyrnumaður Metz, Tahirys Dos Santos, liggur alvarlega slasaður á sjúkrahúsi eftir skelfilegan bruna á skemmtistað í Crans-Montana í Sviss á gamlárskvöld. Eldurinn kostaði 47 manns lífið og yfir 115 slösuðust.

Metz staðfesti í tilkynningu að Dos Santos, sem er 19 ára bakvörður, hafi hlotið alvarleg brunasár og verið fluttur með þyrlu til Þýskalands þar sem hann er nú í meðferð á sérhæfðri brunasáradeild. Hann var fyrst fluttur á sjúkrahús í Sion áður en honum var komið til Stuttgart.

„Félagið er í áfalli og stendur þétt við bakið á Tahirys og fjölskyldu hans á þessum erfiðu tímum,“ sagði í yfirlýsingu Metz, sem vinnur nú að því að flytja leikmanninn nær heimabæ hans í Frakklandi þegar aðstæður leyfa.

Umboðsmaður hans, Christophe Hutteau, sagði að jákvætt væri að Dos Santos hafi ekki þurft öndunarvél, þrátt fyrir að ástand hans sé mjög alvarlegt. „Það er allt of snemmt að draga ályktanir,“ sagði hann.

Dos Santos hefur spilað tíu leiki fyrir varalið Metz á tímabilinu og var nýverið í leikmannahópi aðalliðsins í Franska bikarnum. Hann var í fríi þegar slysið átti sér stað.

Metz hefur beðið fjölmiðla og almenning um að virða friðhelgi leikmannsins og fjölskyldu hans.