Kobbie Mainoo ætlar sér ekki að gefast upp hjá Manchester United þrátt fyrir erfiða stöðu undir stjórn Ruben Amorim.
Mainoo er aðeins tvítugur en var í stóru hlutverki undir stjórn Erik ten Hag, þar sem liðið varð til að mynda bikarmeistari vorið 2024. Staðan hefur þó breyst hratt eftir komu Ruben Amorim fyrir rúmu ári.
Mainoo hefur verið sterklega orðaður við brottför en The Sun segir hann staðráðinn í að endurvekja feril sinn hjá United.
United neitaði beiðni Mainoo um að fara á láni í sumar og er ólíklegt að hann fari í janúar, til að mynda vegna meiðsla í leikmannahópnum og hjá honum sjálfum. Þá virðist hugur hans hafa breyst ef marka má þessar nýju fregnir.
Mainoo er samningsbundinn United til 2027, með möguleika á árs framlengingu.
