Stuðningsmenn Liverpool létu Arne Slot margir hverjir heyra það á samfélagsmiðlum eftir markalaust jafntefli gegn Leeds á Anfield í gær.

Liverpool stýrði leiknum en tókst ekki að brjóta niður skipulagða vörn Leeds. Besta færið í fyrri hálfleik fékk Hugo Ekitike þegar hann skallaði yfir markið úr góðu færi eftir fyrirgjöf frá Jeremie Frimpong.

Í seinni hálfleik reyndi Slot að hrista leikinn upp með skiptingum. Florian Wirtz, sem var keyptur á yfir 100 milljónir punda í sumar, fór af velli á 66. mínútu og inn komu Cody Gakpo, Alexis Mac Allister og Milos Kerkez. Skiptingarnar vöktu hins vegar mikla óánægju meðal stuðningsmanna.

Gakpo þótti gera lítið og margir gagnrýndu að Federico Chiesa og ungi kantmaðurinn Rio Ngumoha hefðu ekki fengið tækifæri fyrr. „Slot tekur Wirtz út af þegar við þurfum mark, algjörlega ráðvilltur,“ skrifaði einn stuðningsmaður. Annar sagði meðferð Slot á Chiesa skammarlega.

Úrslitin þýða að Liverpool er í fjórða sæti, 12 stigum frá toppliði Arsenal, eftir leiki umferðarinnar.