Helgi Fannar Sigurðsson skrifar frá Sviss
Íslenska kvennalandsliðið hefur leik á EM á miðvikudag þegar liðið mætir Finnlandi. Aðstæður gætu orðið erfiðar sökum mikils hita sem nú er í Sviss, sem og víðar í Evrópu.
Stelpurnar okkar hafa æft í miklum hita undanfarna daga, fyrst í Serbíu og svo hér í Sviss. Hitinn hefur farið vel yfir 30 gráðurnar og þegar flautað verður til leiks klukkan 18 á miðvikudag eiga að vera upp undir 30 gráður og heiðskírt að mestu.
Hversu mikil áhrif veðurskilyrðin hafa verður að koma í ljós, en afar mikilvægt er að íslenska liðið vinni þennan leik. Finnland er slakasta lið riðilsins á pappír og þarna þarf að taka þrjú stig fyrir framhaldið, en hin liðin í riðlinum eru Sviss og Noregur.
Dagskrá Íslands á EM
2. júlí gegn Finnum
6. júlí gegn Sviss
10. júlí gegn Noregi
