Dr. Football, Hjörvar Hafliðason var mættur í Kópavoginn í gær þegar Breiðablik vann 3-1 sannfærandi sigur á Víkingum í leik þessara bestu liða landsins.

Víkingur og Breiðablik hafa haft mikla yfirburði í íslenskum fótbolta en Blikar höfðu yfirhöndina í gær.

Hjövar sat í stúkunni og það voru nokkrir Blikar rétt hjá honum sem bentu honum að horfa á varamannabekk Blika ef þeir myndu skora.

„Það var mjög áhugavert stöff í þessum leik, ég sat hjá sérfræðingateymi Blika. Þeir báðu mig að taka eftir því þegar Blikar skora, þá joggar Haraldur Björnsson markmanns þjálfari og kallar „Fókus“. Hann bendir á hausinn á sér og á Anton Ara,“ sagði Hjörvar í þætti sínum í dag.

Hjörvar segir að þetta sé ansi skemmtilegt. „Þetta er einn besti leikþátturinn sem er í gangi í íslenskum fótbolta í dag, hann gerir þetta alltaf.“

Anton Ari Einarsson markvörður Breiðabliks hélt fókusnum vel í gær. „Anton hélt að þetta væri eitthvað merkilegt og kippti sér við, þá kom bara „Fókus“.“

Haraldur er á sínu öðru ári sem markmannsþjálfari Breiðabliks en hann átti farsælan feril með leikmaður bæði í atvinnumennsku og hér á landi með Val og Stjörnunni.