Kevin de Bruyne er í dag orðaður við Liverpool en hann mun að öllum líkindum yfirgefa Manchester City í sumar.

De Bruyne verður samningslaus í sumar en þessi 33 ára gamli leikmaður hefur spilað með City í tíu ár.

Enskir miðlar rifja upp gömul ummæli Trent Alexander Arnold sem vekja nú athygli en þau eru um þriggja ára gömul.

Trent hefur sjálfur ákveðið að kveðja Liverpool en hann sagði á sínum tíma að hann væri mjög til í að spila með De Bruyne hjá félaginu.

,,De Bruyne og Heung Min Son. De Bruyne því ég dáist að honum sem leikmanni. Hans útsjónarsemi, tækni og nákvæmni,“ sagði Trent.

,,Hann er stórkostlegur leikmaður. Það er ógnvekjandi að hugsa út í stoðsendingarnar sem hann hefur átt og færin sem hann skapar.“

,,Son er annar framúrskarandi leikmaður. Hraðinn, færanýtingin og hversu afslappaður hann er fyrir framan markið.“