FH getur ekki tekið þátt í undanúrslitum Lengjubikars kvenna þar sem liðið er á leið í æfingaferð sem skarast á við leikinn. Ekki náðist samkomulag við Þór/KA, andstæðinginn í undanúrslitunum, um að spila leik liðanna eftir að FH kemur heim úr ferðinni.

Guðni Eiríksson, þjálfari FH, er allt annað en sáttur við þetta. Segir hann að liðið hafi tímasett æfingaferð sína með það til hliðsjónar að hún skaraðist ekki á við landsliðsverkefni hjá KSÍ. Er hann svekktur út í bæði sambandið og Þór/KA.

„Mér finnst þetta bara galið. Við veljum tímasetningu með landsliðsverkefni Íslands til hliðsjónar. Það er þessi dagsetning fyrir æfingaferð sem hentar upp á það að gera að ferðin rekst ekki á landsliðsverkefni. Okkur er refsað fyrir það af sambandinu,“ segir Guðni í samtali við Fótbolta.net.

„Þór/KA sagði nei við því að spila 30. mars og þá er þetta bara svona, af því rétturinn er þeim megin. Mér finnst þetta lélegt.“

Stjarnan tekur sæti FH í undanúrslitum og mætir Þór/KA. Í hinum undanúrslitaleiknum mætast Breiðablik og Valur.