Bournemouth býst við að selja kantmanninn Antoine Semenyo til Manchester City á næstu 48 klukkustundum og er félagið þegar farið að leita að arftaka hans.

Samkvæmt Talksport hafa félögin átt í jákvæðum viðræðum um greiðslufyrirkomulag á 65 milljóna punda kaupverðinu og virðist City ætla að vinna kapphlaupið um þennan 25 ára gamla Ganverja.

Semenyo spilað frábærlega á tímabilinu og var einnig áhugi á honum frá Liverpool, Tottenham, Manchester United og Chelsea, en City virðist vera að hreppa hann.

Kantmaðurinn skrifaði undir nýjan fimm ára samning við Bournemouth síðasta sumar og var þá talinn lykilmaður í langtímaáætlunum félagsins, en staðan hefur breyst hratt eftir gott haust.

Gert er ráð fyrir að Semenyo ferðist með Bournemouth til London og spili gegn Chelsea á Stamford Bridge í kvöld, sem gæti orðið hans síðasti leikur fyrir félagið. Hann hefur þegar gefið munnlegt samþykki fyrir félagaskiptunum og formlegt ferli hefst þegar félagaskiptaglugginn opnar 1. janúar.

The Guardian segir Bournemouth svo horfa til Brennan Johnson, leikmanns Tottenham, sem hugsanlegs arftaka Semenyo. Hann hefur lítið fengið að spila með Tottenham undanfarið.