Tvær goðsagnir í enska boltanum talast ekki saman en það eru leikmenn sem flestir knattspyrnuáhugamenn kannast við.

Um er að ræða þá Michael Owen og Alan Shearer sem voru frábærir markaskorarar upp á sitt besta á sínum ferli.

Shearer var stjóri Newcastle árið 2008 er Owen var leikmaður liðsins og gagnrýndi viðhorf og vinnuframlag leikmannsins verulega á þeim tíma.

Shearer ætlaði að byrja með Owen í framlínunni gegn Aston Villa í mikilvægum leik í fallbaráttu en sá síðarnefndi vildi meina að hann væri ekki klár í slaginn og gæti ekki spilað.

Shearer sagði seinna meir að Owen hefði getað gert mun meira til að hjálpa félaginu – eitthvað sem sóknarmaðurinn tók persónulega.

,,Við tölum ekkert saman ef ég er hreinskilinn, við erum bara sammála um að vera ósammála,“ sagði Owen.

,,Innst inni þá líkar mér mjög vel við hann en hann gerði risastór mistök með þessum ummælum.“