Nýr launasjóður íslenskra afreksíþróttamanna var á dögunum stofnaður og kynntur af ÍSÍ og Afreksmiðstöð Íslands og opinberað hverjir hljóta styrk. Bjarni Helgason, blaðamaður á Morgunblaðinu, stakk niður penna um málið í blað dagsins og segir að betur megi ef duga skal.

„Launaflokkar afreksíþróttafólksins eru þrír talsins, en launþegar fá annaðhvort 560.000 krónur á mánuði, 300.000 krónur á mánuði eða loks 150.000 krónur á mánuði. Þetta er klárlega bylting þegar kemur að réttindum íþróttafólks, sem getur nú loksins farið að borga í lífeyrissjóð og verið skattgreiðendur með öllum þeim réttindum og kostum sem því fylgja. Það er búið að tuða endalaust yfir því hversu réttindalaust íslenskt íþróttafólk er og þetta er klárlega skref í rétta átt,“ skrifar Bjarni meðal annars.

Bjarna finnst þó leitt að ekki fari meiri peningar í málaflokkinn og skorar á stjórnvöld.

„Kannski er ég bara svona ógeðslega mikill „fúll á móti gæi“ en ég get ekki að því gert að hrista hausinn yfir því að langflestir launþegarnir séu að þéna 150.000 krónur á mánuði. Ég get fullyrt það að 150.000 krónur á mánuði gera þig ekki samkeppnishæfan á alþjóðavettvangi.

Við verðum einfaldlega að setja meiri peninga í íþróttafólkið okkar, ef við viljum gera meiri kröfur en þær að vera með og hafa gaman. Vandamálið liggur eflaust á mörgum stöðum. Stjórnmálafólk hér á landi virðist ekki sjá ágóðann af því að setja peninga í íþróttastarf, sem er sorglegt.“