Bruno Fernandes hefur á ný verið orðaður við flutning frá Manchester United, á sama tíma og félagið er sagt tilbúið að selja fjóra leikmenn í janúar.

Í sumar var Fernandes sterkt tengdur við Sádi-Arabíu og áttu Al Hilal að hafa gert afar freistandi tilboð, en portúgalski landsliðsmaðurinn kaus að vera áfram á Old Trafford þar sem hann vildi spila á hæsta stigi og berjast um titla.

Þrátt fyrir samning til 2027, með möguleika á árs framlengingu, heldur orðrómurinn áfram og Barcelona er reglulega nefnt sem mögulegur áfangastaður. Gaizka Mendieta, fyrrverandi leikmaður Barca, telur Fernandes myndu falla einstaklega vel að félaginu.

„Hann hefur hæfileikana til að blómstra í La Liga og Barcelona-stuðningsmenn myndu elska hann,“ sagði Mendieta. Hann bendir á að Fernandes gæti verið ósáttur með að spila dýpra í kerfi Ruben Amorim.

Fernandes er að upplagi tíu og hefur verið færður aftar á miðjuna í vetur. United er í 7. sæti eftir 13 umferðir.