Napoli hyggst gera nýtt áhlaup í janúar til að fá miðjumanninn Kobbie Mainoo frá Manchester United, samkvæmt frétt Gazzetta dello Sport á Ítalíu.

Antonio Conte, sem hefur stýrt Napoli á topp Serie A, telur sig hafa fundið sigurformúlu með því að endurlífga ferla leikmanna sem hafa átt undir högg að sækja á Old Trafford.

Scott McTominay og Rasmus Højlund hafa báðir náð miklum árangri eftir komu sína til Ítalíu, og nú vonast Napoli til að gera hið sama með Mainoo.

Félagið sýndi honum áhuga síðasta sumar en er nú tilbúið að reyna aftur þegar félagaskiptaglugginn opnast í janúar.

Mainoo, sem er aðeins 20 ára, var talinn framtíðarleikmaður í miðju Manchester United og lék stórt hlutverk með enska landsliðinu á EM í fyrra. Hins vegar hefur hlutverk hans minnkað verulega undir stjórn Rubens Amorim á þessu tímabili.

Hann hefur aðeins fengið að spila 138 mínútur í ensku úrvalsdeildinni og oft byrjað leiki á bekknum. Napoli telur að með meiri spilatíma og trausti gæti Mainoo endurheimt sjálfstraust sitt og sér hann sem fullkominn kost í miðju liðsins sem nú berst á toppi ítölsku deildarinnar.