Síðustu vikur í Bestu deild karla hafa spilast vel fyrir Víking. Liðið hefur unnið síðustu tvo leiki á meðan bæði Valur og Breiðablik hafa tapað stigum. Arnar Gunnlaugsson, þjálfari liðsins, er þó ekki of upptekinn af þessu.

Víkingur er sem stendur með 33 stig á toppi deildarinnar, 5 stigum á undan Val og 6 á undan Breiðabliki.

„Ég tók þá ákvörðun fyrir tímabilið að vera ekki að hugsa ekki of mikið um önnur lið þó maður auðvitað fylgist með. En það gefur auðvitað „boost“ að hin liðin séu að tapa stigum. En það er gamla klisjan, við erum bara við sjálfir. Mér finnst eins og við séum okkar helsti andstæðingur,“ sagði Arnar við 433.is í gær.

„Til að vera á öllum þessum vígstöðvum þarftu smá heppni með þér. Það þurfa hlutir að falla með þér hvað varðar meiðsli, dómaraákvarðanir, stöngin inn eða stöngin út. Þannig á það líka að vera, það á að vera erfitt að vinna titla.“

Arnar benti þó á að þó að staðan líti vel út fyrir ríkjandi meistara sem stendur séu hlutirnir fljótir að breytast.

„Við erum í góðri stöðu núna en Valur var líka í góðri stöðu fyrir stuttu síðan. Svo allt í einu tapa þeir í deild og bikar. Þetta er ótrúlega fljótt að gerast. Við gætum tapað á morgun og svo á móti KA í næsta leik. Þá er heimurinn að farast. Þetta er fljótt að breytast. En ég held að það sé góð reynsla í þessum hóp og gæði sem koma í veg fyrir það.“

Viðtalið við Arnar í heild er í spilaranum, en það var rætt við hann í tilefni að leiknum gegn Shamrock Rovers í 1. umferð undankeppni Meistaradeildar Evrópu í kvöld.