Breiðablik er komið í úrslitaleik Mjólkurbikars kvenna fjórða árið í röð eftir sigur á Þór/KA fyrir norðan í kvöld.
Það var ekkert skorað í venjulegum leiktíma og því farið í framlengingu. Þar var töluvert meira fjör.
Hrafnhildur Ása Halldórsdóttir kom Blikum yfir á 9. mínútu framlengingarinnar en rétt fyrir leikhlé jafnaði markavélin Sandra María Jessen fyrir heimakonur.
Írena Héðinsdóttir Gonzalez skoraði hins vegar sigurmark leiksins fyrir Blika á 113. mínútu. Lokatölur 1-2.
Blikar mæta Val eða Þrótti í úrslitaleiknum en liðin mætast á Hlíðarenda á morgun.
