Kristján Guðmundsson hefur látið af störfum sem þjálfari meistaraflokks kvenna hjá Stjörnunni og er Jóhannes Karl Sigursteinsson tekinn við. Félagið greindi frá þessu fyrir skömmu.

Kristján tók við Stjörnunni haustið 2018 og hefur liðið gert vel undir hans sjórn undanfarin ár. Gengið á þessari leiktíð hefur þó verið erfitt og situr Stjarnan í áttunda sæti.

Tilkynning Stjörnunnar
Kristján Guðmundsson hefur óskað eftir því að stíga til hliðar sem þjálfari meistaraflokks kvenna. Kristján Guðmundsson tók við liði Stjörnunnar í október 2018 og undir hans stjórn hefur liðið tekið miklum framförum, bætt árangur sinn á milli ára og tekið þátt í Evrópukeppni félagsliða.

Á sama tíma og við þökkum Kristjáni kærlega fyrir vel unnin störf og óskum honum velfarnaðar í hverju því sem hann tekur sér fyrir hendur þá tökum við vel á móti nýjum þjálfara en Jóhannes Karl Sigursteinsson hefur unnið með þjálfarateyminu við leikgreiningar síðustu 2 ár og þekkir því vel til liðsins.

Takk kærlega fyrir okkur Kristján Guðmundsson og velkominn Jóhannes Karl Sigursteinsson