Það verður aðeins seldur léttbjór á fyrsta leik Englands gegn Serbíu á EM í Þýskalandi á sunnudag. Þýska lögreglan tekur þessa ákvörðun með öryggissjónarmið að leiðarljósi.

Enskir stuðningsmenn eru ekki þekktir fyrir að haga sér vel á stórmótum og til að bæta gráu ofan á svart býst lögreglan við um 500 serbneskum bullum. Í enskum miðlum kemur fram að þessi hópur Serba styðji Vladimir Putin, Rússlandsforseta.

Það er því hætt við því að læti verði milli stuðningsmanna og til að draga úr því verður aðeins seldur 2,5-2,8% bjór í stað þess 4,8% bjórs sem verður svo seldur á Veltens Arena í Gelsenkirchen það sem eftir lifir móts.

Alls er búist við um 40 þúsund Englendingum á leikinn og 8 þúsund Serbum.

Eins og oft áður eru miklar vonir bundnar við enska liðið og vill þjóðin sjá fótboltann koma heim.