Moises Caicedo, leikmaður Chelsea, hefur fengið þónokkra gagnrýni eftir að hann gekk í raðir félagsins í sumar.

Caicedo var mjög eftirsóttur í sumarglugganum en hann var mjög öflugur fyrir Brighton síðasta vetur og kostaði að lokum 115 milljónir punda.

Hingað til hefur Caicedo ekki verið of sannfærandi og eru einhverjir byrjaðir að efast um hans gæði og hvort hann sé nógu góður til að spila fyrir topplið á Englandi.

Mauricio Pochettino, stjóri Chelsea, segir að það sé ósanngjarnt að gagnrýna frammistöðu Caicedo hingað til og hefur sjálfur enn fulla trú á hæfileikum leikmannsins.

,,Hann kom til okkar þegar við vorum nú þegar að spila leiki í ensku úrvalsdeildinni og spilaði ekkert á undirbúningstímabilinu,“ sagði Pochettino.

,,Hann meiddist svo með landsliðinu og fékk engan tíma til að hvíla sig eða ná sér að fullu. Nú getur hann einbeitt sér alveg að Chelsea í nokkra mánuði, það er ósanngjarnt að bera hann saman við hvernig hann var á síðasta tímabili.“