Það er aðeins ár síðan KR féll úr efstu deild en ekkert virðist geta stöðvað það að liðið falli annað árið í röð.
Mikael Nikulásson, þjálfara KFA í 2. deild karla og KR-ingi, er ekki skemmt.
„Það er alltaf röflað um aðstöðuleysi í Vesturbænum. Þetta er mesta kúkaafsökun sem ég hef heyrt. Þegar ég var að alast upp var KR topplið í körfubolta og þá spiluðu þeir í Hagaskóla. Núna eiga þeir heila höll, það má ekki einu sinni vera handbolti í félaginu af því hann er fyrir,“ segir Mikael, en bæði karla- og kvennalið KR í körfubolta eru einmitt fallin úr efstu deild.
„Er það aðstöðuleysi? Þeir eiga þessa höll,“ segir Mikael.
Hann segir til skammar hvernig er komið fyrir kvennafótbolta í KR þó hann sé ánægður með að Rálmi Rafn Rálmason hafi tekið við stöðu aðalþjálfara á dögunum.
„Það hefði allt eins verið hægt að loka sjoppunni í kvennaboltanum hjá KR eins og menn hafa hagað sér gagnvart honum. Það er öllum drullusama um hann þarna.
Ég er ánægður með Pálma að hafa ástríðu fyrir að taka við þessu á vonlausum tíma. Hann sýnir smá KR hjarta og ég er ánægður með það.“
Mikael baunar þó áfram á félagið.
„Fyrir mér er það ekkert nema skandall að kvennalið KR sé að falla í 2. deild. Það er ekki stelpunum í liðinu að kenna, þetta eru ungar stelpur og það er ekkert lagt í þetta.
Annað hvort þurfa menn að rífa þetta almennilega upp eða leggja þetta bara niður eins og þeir gerðu með handboltann og viðurkenna bara að þeir nenni ekki kvennafótbolta.“
