Valur gerði góða ferð í Úlfarsárdalinn þar sem liðið heimsótti Fram í Bestu deild karla í kvöld.
Leikurinn hafði verið fremur rólegur þegar Fram tók forystuna á 34. mínútu. Þá skoraði Fred Saraiva eftir fyrirgjöf Magnúsar Þórðarsonar.
Sú forysta dugði þó skammt því nokkrum mínútum síðar fékk Valur vítaspyrnu. Dómurinn var afar umdeildur en Guðmundur Andri Tryggvason virtist detta ansi léttilega í teignum. Andri Rúnar Bjarnason fór á punktinn og skoraði af öryggi.
Seinni hálfleikur fór vel af stað og eftir um tíu mínútur af honum var annað víti dæmt. Nú á Val. Guðmundur Magnússon fór á puntkinn en spyrnan var slök og Fredrik Schram varði.
Á 74. mínútu höfðu Framarar verið í dauðafæri öðrum megin á vellinum þegar gestirnir geystust upp hinum megin. Adam Ægir Pálsson, sem átti frábæran leik, lagði boltann svo á varamanninn Tryggva Hrafn Haraldsson sem skoraði.
Valur skoraði keimlíkt mark tveimur mínútum síðar. Adam lagði boltann á Tryggva sem skoraði sitt annað mark.
Lokatölur 1-3 fyrir Val. Liðið er með sex stig í öðru sæti eftir fyrstu þrjá leiki sína. Fram er hins vegar með tvö stig í tíunda sæti.
