Málefni Aston Villa voru til umræðu í Vellinum, þætti Símans Sport um ensku úrvalsdeildina, í gær.
Villa tapaði gegn Crystal Palace um helgina og er með þrjú stig eftir þrjá leiki í deildinni.
Steven Gerrard er stjóri liðsins og hefur hann fengið töluverða gagnrýni.
„Þetta eru þrír leikir. Hann fær klárlega meiri tíma, þeir eru ekki að fara að reka hann. En hann, eins og allir aðrir, þarf að fá stig,“ sagði Gylfi Einarsson, fyrrum leikmaður Leeds og fleiri liða.
Knattspyrnugoðsögnin Eiður Smári Guðjohnsen var einnig í þættinum. „Láttu mig þekkja það,“ sagði hann léttur og vísaði í gengi sitt með lið FH undanfarið.
Eiður er þjálfari FH í Bestu deild karla og hefur gengi liðsins í sumar verið arfaslakt. FH er í tíunda sæti deildarinnar með ellefu stig eftir sautján leiki.
Liðið mætir Keflavík í mikilvægum leik í kvöld. Líkt og Eiður segir þarf liðið sannarlega á stigum að halda þar.
