Það er hálfgert Breiðabliks partý í herbúðum íslenska landsliðsins sem nú er í Tyrklandi. Alfons Sampsted bakvörður liðsins hefur gaman af því. Alfons ólst upp í Breiðablik en leikur nú með Bodo/Glimt í Noregi.
Auk Alfons eru það Damir Muminovic, Höskuldur Gunnlaugsson, Gísli Eyjólfsson, Viktor Karl Einarsson, Sveinn Aron Guðjohnsen og Brynjólfur Willumsson sem eru í hópnum sem spila eða hafa spilað með Blikum.
Brynjólfur hefur lítið verið strákunum enda greindist hann með veiruna skæðu í Tyrklandi. „Þetta er mjög gaman, fyrir mig er þetta eins og maður sé kominn í Blikana. Það er landsliðsbragur yfir þessu samt,“ sagði Alfons.
„Það er gaman að tengja við leikmenn sem maður þekkir vel. Það á ekki að taka langan tíma að finna tengingu á vellinum, þetta verður gaman,“ sagði Alfons en liðið mætir Suður-Kóreu á morgun.
Alfons fær væntanlega mörg tækifæri með landsliðinu á þessu ári nú þegar Birkir Már Sævarsson er hættur. Var Alfons svekktur með að fá ekki stærra hlutverk á síðasta ári?
„Ég var í samkeppni við Birki sem gerði frábæra hluti fyrir landsliðið. Hann skilar alltaf sinni vinnu, kannski svekkjandi að hafa ekki spilað meira. Frábært fyrir mig að fá tíma við hlið hans og læra af honum, læra hvernig hlutirnir virka. Svekkjandi og ekki en ég lærði helling.“
