Anna Lúðvíksdóttir, framkvæmdastjóri Amnesty á Íslandi, segir í samtali við Fréttablaðið að hún vonist til þess að Knattspyrnusamband Íslands sendi sterk skilaboð er karlalandsliðið mætir Sádi-Arabíu í vináttulandsleik Sameinuðu arabísku furstadæmunum í nóvember.

Ákvörðun KSÍ um að samþykkja að spila þennan vináttulandsleik hefur verið gagnrýnd töluvert, enda mannréttindi oft fótum troðin í landinu.

Vanda Sigurgeirsdóttir, formaður KSÍ, hefur hins vegar sagt að í stað þess að sniðganga leiki líkt og þennan við Sáda ætli sambandið að nýta tækifærið og senda sterk skilaboð, KSÍ sé með konur í lykilstörfum og að hún geti flutt áhrifamiklar ræður.

„Amnesty vonar auðvitað að KSÍ noti tækifærið rækilega til þess að koma skilaboðum áleiðis og fordæma þau mannréttindabrot sem eru framin í Sádí-Arabíu,“ segir Anna. Hún sagði jafnframt að Amnesty taki ekki afstöðu til ákvörðunar KSÍ um að spila leikinn. Hún hafi þó trú á að KSÍ geti fengið einhverja til að sjá ný sjónarmið í nóvember.

Nánar er rætt við Önnu í Fréttablaðinu.