Katia Dolores systir Cristiano Ronaldo hefur sett allt á annan endann með því að líka við færslu þar sem kallað er eftir því að Ronaldo fari frá Manchester United í sumar.

Allt er í klessu hjá United um þessar mundir en félagið fékk Ronaldo aftur síðasta sumar og héldu margir að félagið gæti barist um titla.

Liðið hefur hins vegar spilað illa og úrslitin verið í samræmi við það, Ronaldo er 37 ára gamall og á eitt ár eftir af samningi sínum.

Framtíð Ronaldo hefur verið til umræður en „lækið“ frá Katia hefur vakið mikla athygli.

„Þetta er sorgleg staða fyrir Ronaldo að vera í þessu Manchester United liði, Cristiano þarf ekki að vera áfram til að sanna ást sína á félaginu. Hann sannaði það með því að koma aftur þegar Manchester City vildi fa hann, sem er miklu betra lið í dag,“ segir í færslunni sem Katia líkar við.

„Cristiano þarf að hugsa um Cristiano, hann á fjögur eða fimm ár eftir. Leitaðu þér að betra liði því þú getur haldið áfram að vinna miklu fleiri titla.“