Genoa tók á móti Juventus í 36. umferð Seria A í kvöld Leiknum lauk með 2-1 endurkomusigri Genoa.

Gestirnir í Juventus voru meira með boltann og stjórnuðu fyrri hálfleiknum en sköpuðu sér lítið af færum. Markalaust var þegar flautað var til hálfleiks.

Juventus byrjaði seinni hálfleikinn af krafti en Paulo Dybala kom þeim yfir á 48. mínútu eftir stoðsendingu frá Moise Kean. Heimamenn í Genoa fóru að færa sig framar á völlinn eftir markið, voru meira með boltann og áttu nokkur skot að marki.

Albert Guðmundsson byrjaði á bekknum en kom inná á 69. mínútu fyrir Mattia Destro. Hann náði heldur betur að setja mark sitt á leikinn en hann jafnaði fyrir Genoa á 87. mínútu með frábæru marki eftir góða stoðsendingu Nadiem Amiri. Þetta var fyrsta mark hans í Seria A.

Genoa fékk vítaspyrnu í uppbótartíma leiksins, Criscito fór á punktinn og kláraði af öryggi og tryggði Genoa stigin þrjú.

Genoa er í 19. sæti deildarinnar með 28 stig, einu stigi á eftir Salernitana í öruggu sæti sem á leik til góða. Juventus er í fjórða sæti deildarinnar og öruggir með Meistaradeildarsæti.

Genoa 2 – 1 Juventus
0-1 Paulo Dybala (´48)
1-1 Albert Guðmundsson (´87)
2-1 Domenico Criscito (´90+6)