Marcel Römer, fyrirliði Lyngby í Danmörku verður í leyfi frá störfum um óákveðinn tíma eftir að eiginkona hans lést á mánudag.
Cecile eiginkona hans lést á mánudag en Römer er lykilmaður í Lyngby þar sem Freyr Alexandersson er þjálfari liðsins.
Römer á einnig tvo íslenska liðsfélaga en Sævar Atli Magnússon og Frederik Schram eru í herbúðum danska liðsins sem leikur í næst efstu deild.
„Við höfum þau skelfilegu tíðindi að færa að á mánudaginn lést eiginkona Marcel,“ sagði Andreas Byder framkvæmdarstjóri Lyngby við danska fjölmiðla.
Römer minnist Cecile á Instagram. „28. febrúar lést ástin í lífi mínu á hörmulegan hátt. Takk fyrir alla ástina sem við höfum fundið,“ skrifar Römer.
„Hjarta mitt er brotið, þetta átti aldrei að gerast. Þú átt þetta ekki skilið, núna er ég að hugsa um drauma okkar og markmið sem par og fjölskylda. Við náðum þeim ekki. Það er sárt að hugsa til þess að yndislegu börnin þín skuli ekki alast upp með sinni mögnuðu móður. Allar ákvarðanir mínar í framtíðinni verða með það markmiði að gera þig stolta. Börnin þín eru í góðum höndum.“
„Ég elska þig óendanlega mikið og mun alltaf gera, þangað til við hittumst aftur.“
Kjartan Henry Finnbogason framherji KR skrifar við færslu Römer og segir. „Ég hugsa hlýlega til þín og þinnar fjölskyldu.“
Römer er þrítugur knattspyrnumaður en hann hefur leikið 17 leiki með Lyngby í ár en liðið er í öðru sæti í næst efstu deild.
View this post on Instagram
