Gunnar Egill Daníelsson blaðamaður á Morgunblaðinu stingur niður penna í blað dagsins og skrifar um málefni Cristiano Ronaldo og ásökun á hans hendur um nauðgun árið 2009. Mayorga segir að Ronaldo hafi nauðgað sér árið 2009, atvikið á að hafa átt sér stað í Las Vegas. Ronaldo hefur alltaf hafnað sök um nauðgun og aðilar tengdir honum ítrekað það.
Þar var Ronaldo í sumarfríi með vinum sínum áður en hann samdi við Real Madrid og varð dýrasti knattspyrnumaður í heimi. Lýsingarnar frá Mayorga eru afar óhugnanlegar en þar fer hún yfir málið í öllum smáatriðum. Hún skrifaði undir bréf þess efnis um að tjá sig aldrei um málið, fyrir það fékk hún talsverðar fjárhæðir.
Meira
Hér má lesa ítarlega lýsingu Mayorga um málið
Ronaldo snéri aftur í enska boltann á dögunum og hefur skorað þrjú mörk í fyrstu tveimur leikjunum sínum. Endurkoma hans var um liðna helgi gegn Newcastle. „Meðan á leiknum stóð flaug flugvél yfir Old Trafford með borða á þar sem stóð: „Trúum Kathryn Mayorga.“ Level Up-samtökin stóðu fyrir fluginu en Mayorga þessi sakaði Ronaldo um að hafa nauðgað henni í Las Vegas sumarið 2009,“ skrifar Gunnar Egill í íþróttasíðu Morgunblaðsins í dag.
Gunnar rifjar svo upp söguna sem Mayorga hefur sagt í fjölmiðlum. „Í samtali við Der Spiegel árið 2018 sagði Mayorga að Ronaldo hafi verið afar ýtinn þegar þau hittust. Hún kvaðst endurtekið hafa sagt „nei“ og að hún myndi ekki sofa hjá honum. Eftir að hann gerðist æ ágengari hafi hún haldið um kynfæri sín þegar hann stökk á hana og nauðgaði í endaþarminn án verju.“
Gunnar ræðir svo um gögn sem Mayorga hefur undir höndum sem virðast varpa nýju ljósi á málavexti. „Í spurningalista sem lögfræðingar Ronaldo lögðu fyrir hann og Mayorga hefur undir höndum sagði hann sjálfur: „Hún sagði „nei“ og „hættu“ nokkrum sinnum. Ég fór inn í hana að aftan. Það var ruddalegt. Hún sagði að hún vildi þetta ekki en hún gerði sig aðgengilega. En hún hélt áfram að segja „nei,“ „ekki gera þetta“ og „ég er ekki eins og hinar stelpurnar.“ Ég baðst afsökunar eftir á.“,“ skrifar Gunnar Egill í Morgunblaðið.
Meira
Hér má lesa ítarlega lýsingu Mayorga um málið
Gunnar heldur svo áfram. „Svo virðist sem þessi frásögn sé að stóru leyti gleymd og grafin og/eða hafi farið fram hjá fjölda fólks á sínum tíma. Miðað við það sem bæði Mayorga og Ronaldo segja fékk hann ekki samþykki fyrir kynmökum.“
„Það að hann sé stórstjarna, einn besti knattspyrnumaður sögunnar og að þetta átti sér stað fyrir rúmum 12 árum, breytir því ekki að Ronaldo þarf að fá samþykki eins og allir aðrir,“ skrifar Gunnar að endingu.