Stúlkurnar þrjár sem tóku myndir með með fyrrum knattspyrnustjörnunni, nú knattspyrnustjóranum, Wayne Rooney, á hótelherbergi á meðan hann var sofandi um síðustu helgi hafa beðið hann afsökunar. Þær hafa einnig selt honum höfundaréttinn á myndunum fyrir aðeins 1 pund. Selja þarf slíkan rétt af lagalegum ástæðum.

Eins og frægt er orðið buðu Wayne og félagar hans þremur 21 árs gömlum stelpum á borðið til sín á næturklúbbi í Manchester um síðustu helgi. Eftir á fór gengið svo á hótelherbergi stelpnanna.

Þar eyddu þau einhverjum tíma saman. Ekkert af kynferðislegum toga átti sér þó stað. Wayne dó svo áfengisdauða á stól í herberginu. Í kjölfarið tóku stelpurnar myndir af honum gegn hans leyfi. Til dæmis rak ein þeirra rassinn á sér í andlitið á honum á einni myndinni.

Þetta var Rooney afar ósáttur með og hafði samband við lögreglu. Nú hafa allir aðilar hins vegar náð sáttum og er málinu talið lokið.

,,Stúlkurnar þrjár sem tóku myndirnar hafa haft samband við lögmenn Wayne og boðist til þess að færa þeim allar myndirnar sem og höfundaréttinn á þeim,“ sagði talsmaður Rooney.

,,Þær hafa einnig, af eigin frumkvæði, gefið honum skriflega afsökunarbeiðni vegna þess sem gerðist.“

,,Þetta eru þrjár almennilegar ungar konur sem fóru út að skemmta sér. Þær bjuggust ekki við því að eyða kvöldinu með Wayne og þær sjá eftir því hvernig þetta fór.“

,,Þær bjuggust ekki við því að myndirnar myndu rata í fjölmiðla eftir að þær settu þær á samfélagsmiðla.“