Brynjar Ingi Bjarnason leikmaður KA hefur heldur botið skotist upp á stjörnuhiminn á síðustu vikum. Brynjar lék þá sína fyrstu A-landsleiki og sló í gegn, hann var frábær í nýliðnu verkefni A-landsliðsins og skoraði meðal annars mark í 2-2 jafntefli gegn Póllandi.
Brynjar er 21 árs gamall og kemur frá Akureyri, saga hans óvenjuleg en Brynjar hefur aldrei spilað fyrir yngri landslið Íslands.
Víðir Sigurðsson blaðamaður á Morgunblaðinu skrifar um Brynjar í blaði dagsins. „Brynjar Ingi Bjarnason er nafn sem skyndilega er á allra vörum, allavega hjá þeim sem hafa fylgst með vináttulandsleikjum karlalandsliðsins í fótbolta að undanförnu. Saga hans er óvenjuleg í fótbolta síðari ára þar sem keppst er við að finna hæfileikaríkustu ungmennin sem allra fyrst og helst strax í 5. flokki. Sjá svo til þess að þau séu búin að spila tugi leikja með yngri landsliðum og komin á atvinnusamning á táningsaldri,“ skrifar Víðir í Morgunblað dagsins.
Víðir fer svo yfir leikinn gegn Póllandi þar sem Brynjar sló í gegn. „Svo kemur strákur frá Akureyri sem aldrei hefur verið valinn í landslið, ekki einu sinni í hóp hjá yngra landsliði, fyrr en hann dettur óvænt inn í A-landsliðið, 21 árs gamall, og slær í gegn. Skorar meira að segja einu marki meira en sjálfur Robert Lewandowski, andstæðingur hans í leiknum í Poznan á þriðjudaginn. Lewandowski komst ekki einu sinni í marktækifæri gegn KA-manninum.“
Víðir fer svo yfir því að líkja sögu Brynjars við menn sem hafa skrifað sögu íslenska fótboltans síðustu ár, hetjur liðsins síðustu ár. „Þeir einu í seinni tíð sem ég man eftir að hafi átt sambærilega síðbúna innkomu í landslið eru Birkir Már Sævarsson sem spilaði fyrst landsleik 21 árs gamall, þá reyndar með 21-árs landsliðinu, og Alfreð Finnbogason sem kom tvítugur inn í sama landslið. Birkir lék á dögunum sinn 98. A-landsleik.“
Víðir spáir því svo að Brynjar leiki ekki marga leiki í viðbót með KA en fjöldi erlendra liða hefur nú áhuga á honum.
