Félögin í ensku úrvalsdeildinni eru að leita nýrra leiða til að berjast gegn kynþáttaníð sem hefur beinst að mörgum leikmönnum deildarinnar. Nú hafa félögin ákveðið að sameinast um það að hverfa af samfélagsmiðlum í nokkra daga til að berjast gegn kynþáttaníð á samfélagsmiðlum sem virðist engan enda ætla að taka.

Búið er að setja upp plan fyrir þetta samfélagsmiðlabann og verður helgin 1.-3. maí fyrir valinu. Þá munu félögin ekki setja neitt á samfélagsmiðla. Opinber aðgangur ensku úrvalsdeildarinnar mun einnig taka þátt í átakinu þessa fyrstu helgi í maí, en þá fer einmitt fram stórleikur Liverpool og Manchester United sem hefði án efa vakið mikið umtal á samfélagsmiðlum.

Fótboltayfirvöld í Bretlandi hafa ítrekað biðlað til samfélagsmiðlanna Facebook og Twitter að hefja aðgerðir til að stoppa kynþáttaníð á þeirra samfélagsmiðlum.

Formaður ensku úrvalsdeildarinnar sendi tölvupóst á til félaganna í deildinni á föstudag þar sem hann hvatti til aðgerða:

„Ekkert venjulegt fótboltatengt efni færi á miðlana. Þetta yrði nýtt til þess að beita þrýstingi á samfélagsmiðlafyrirtæki og vekja athygli á kynþáttaníð og öðrum fordómum sem við sjáum stöðugt á miðlunum.“

Leikmenn verða einnig hvattir til að taka þátt.