Arnór Sigurðsson var í byrjunarliði síns liðs, CSKA Moskvu, sem lagði Rodor Volgograd í rússnessku úrvalsdeildinni nú fyrir stuttu. Hann lagði upp mark í leiknum. Þá spilaði Theódór Elmar Bjarnason lungað úr sigurleik Lamia í efstu deild í Grikklandi.
CSKA vann leikinn 2-0. Arnór lagði upp fyrra mark liðsins en það kom rétt fyrir lok fyrri hálfleiks. Hörður Björgvin Magnússon, sem er einnig á mála hjá CSKA, gat ekki spilað í dag þar sem hann er meiddur á hásin og verður frá í nokkra mánuði.
Lið þeirra er í fjórða sæti deildarinnar með 46 stig. Spartak og Lokomotiv Moskva hafa einu stigi meira í sætunum fyrir ofan þegar fimm umferðir eru eftir. Annað sætið veitir þátttökurétt í Meistaradeildinni svo það er að miklu að keppa.
Theódór Elmar spilaði 76 mínútur er Lamia sigraði Giannina, 1-2. Leikurinn var liður í neðri hluta grísku ofurdeildarinnar sem skipt var upp nýlega. Þegar fjórar umferðir eru eftir er Lamia í þriðja sæti af átta liðum keppninnar, 7 stigum fyrir ofan fallsæti.
