Valur hefur gengið frá samningum við Aron Jóhannsson og Heiðar Ægisson. Aron kemur heim til Íslands eftir ellefu ár í atvinnumennsku.
Heiðar og Aron skrifa báðir undir þriggja ára samning við félagið.
Aron sem er 31 árs gamall rifti samningi sínum við Lech Poznan í Póllandi á dögunum. Ástæðan var sú að Aron meiddist á öxl og tæpt var að hann myndi spila fleiri leiki fyrir pólska félagið.
Hann hefur átt frábæran feril í atvinnumennsku síðustu ellefu ár. Hann hefur spilað með AGF í Danmörku, AZ Alkmaar í Hollandi, Werder Bremen í Þýskalandi, Hammarby í Svíþjóð og nú síðast Poznan í Póllandi.
Aron hafði æft með Vali fyrir tæpu ári síðan. Tímabil Vals í sumar voru vonbrigði og er ljóst að Aron ætti að styrkja liðið verulega.
Hann á að baki nokkurn fjölda leikja fyrir landslið Bandaríkjanna en frægt var þegar hann kaus að velja að spila fyrir Bandaríkin fremur en Ísland.
Heiðar Ægisson kemur til Vals frá Stjörnunni en hann getur leyst ýmsar stöður á vellinum og hefur verið í stóru hlutverki í Garðabæ.
