Rio Ferdinand, fyrrum leikmaður Manchester United, finnst afar ólíklegt að Steven Gerrard vilji fara frá Rangers og taka við stjórastöðunni hjá Newcastle.
Gerrard hefur verið knattspyrnustjóri skoska liðsins Rangers frá 2018 og gerði liðið að skoskum meisturum á síðasta tímabili.
Fjölmiðlar hafa fjallað um að Gerrard sé ofarlega á lista yfir næstu stjóra Newcastle eftir að nýir eigendur keyptu klúbbinn fyrr í mánuðinum. Þá hefur fyrrum liðsfélagi hans hjá enska landsliðinu, Frank Lampard, einnig verið orðaður við starfið. Ferdinand finnst þó afar ólíklegt að Gerrard vilji starfið þar sem hann stefni á stjórastöðuna hjá Liverpool.
„Ég hef séð nafnið hjá Steven Gerrard í umræðunni. En ég sé hann ekki fara þangað því mér finnst eins og hann stefni á Liverpool,“ sagði Ferdindand í þættinum Rio Ferdinand Presents FIVE.
„Hversu lengi verður Klopp hjá Liverpool? Mér finnst líklegt að næsta skref hjá Gerrard verði að taka við Liverpool en ekki Newcastle.“