Nýir eigendur Newcastle United eru í viðræðum við Paulo Fonseca, fyrrverandi knattspyrnustjóra Roma á Ítalíu.

Steve Bruce gekk frá borði í gær eftir tvö ár við stjórnvölinn og eigendurnir frá Sádi-Arabíu leita nú að arftaka hans. Graeme Jones, aðstoðarþjálfari liðsins, tekur við stjórnartaumunum fyrir leik Newcastle gegn Crystal Palace um helgina.

Fonseca var stjóri Roma á árunum 2019-2021 og stýrði liðinu í 5. sæti á fyrsta tímabili sínu með félagið, en þar að auki komst liðið í undanúrslit Evrópudeildarinnar áður en Jose Mourinho tók stöðu hans í sumar.

Portúgalinn var nálægt því að ganga til liðs við Tottenham í júní síðastliðnum áður en Nuno Espirito Santo fékk stjórastarfið í hans stað.

Eddie Howe, Lucien Favre og Roberto Martinez hafa einnig verið orðaðir við þjálfarastarfið hjá Newcastle sem hefur enn ekki unnið leik í ensku úrvalsdeildinni á tímabilinu og er í næstneðsta sæti deildarinnar með tvö stig.