Réttarhöld í fjárkúgunarmáli framherjans Karim Benzema og fyrrum landsliðsmanns Frakklands, Mathieu Valbuena, hefjast á morgun í Frakklandi. Benzema er gefið að sök að hafa verið hluti af hópi manna sem reyndi að kúga fé af Valbuena árið 2015 með því að hóta að birta kynlífsmyndband af honum ef hann myndi ekki greiða þeim fé.

Benzema hefur verið boðaður í réttarsal í Frakklandi á morgun en leikmaðurinn á leik með liði sínu, Real Madrid, í Meistaradeild Evrópu í kvöld. Allt frá því að Benzema var bendlaður við málið hefur lögfræðingateymi hans reynt að hreinsa nafn hans með því að segja að hans aðild sé byggð á misskilningi. Hann hafi í raun verið að reyna hjálpa Valbuena.

Benzema og Valbuena eru fyrrum liðsfélagar í franska landsliðinu. „Ég vildi bara að hann (Valbuena) vissi af því að myndbandinu hefði verið lekið og hjálpa honum vegna þess að hann hafði hjálpað mér áður,“ hefur Benzema látið hafa eftir sér í viðtali um málið.

Benzema getur átt yfir höfði sér fimm ára fangelsisdóm og allt að 75.000 evra sekt verði hann fundinn sekur.

Þegar málið komst upp á sínum tíma var Benzema settur í bann hjá franska landsliðinu, bann sem entist í sex ár eða alveg þangað til að hann var valinn í landsliðshóp Frakklands fyrir Evrópumótið sem fram fór síðasta sumar.