Jack Wilshere viðurkenndi í viðtali á dögunum við The Athletic að hann sé alvarlega að íhuga að leggja skóna á hilluna aðeins 29 ára gamall og sagði einnig frá því að hann sjái mikið eftir því að hafa yfirgefið Arsenal árið 2018.

Wilshere er án félags eftir að Bournemouth losaði hann af samningi í sumar. Hann segist hafa áhyggjur af framtíðinni en það sem hefur mest áhrif á hann eru spurningar frá börnunum sínum.

„Börnin mín eru komin á þann aldur að þau skilja hvað er í gangi. Og það er erfitt að útskýra þetta fyrir þeim, sérstaklega þegar þau spyrja „afhverju vill ekkert félag fá þig pabbi“, hvað á maður eiginlega að segja?“ sagði Wilshere í ítarlegu viðtali við The Athletic.

„Vinir þeirra í skólanum stríða þeim líka á þessu sem er erfitt.“

Hann viðurkenndi einnig í viðtalinu að hann hefur þurft að taka foreldra barnanna á fund til að ræða þessa stríðni en hún kemur oft upprunalega frá foreldrunum sjálfum.

Wilshere æfir einn þessa dagana og er að reyna að koma sér í form og finna sér félag. Hann gæti hugsað sér að spila annars staðar en á Englandi þar sem fólk þekkir hann minna.