Trevor Sinclair var ekki ánægður með ummæli Rio Ferdinand um varnarmanninn Phil Jones, sem leikur með Manchester United.

Jones hefur átt erfitt síðustu ár og hefur hann verið mikið meiddur. Hann á tvö ár eftir af samningi hjá Manchester United en hann skrifaði undir framlengingu árið 2019.

Ferdinand húðskammaði Jones fyrir að hafa skrifað undir þennan samning á sínum tíma og finnst að Jones sé að taka sæti í hópnum af leikmanni úr unglingastarfinu. Sinclair svaraði Ferdinand og sagði að hann hefði farið yfir strikið með þessum ummælum.

„Auðvitað á Jones að samþykkja þetta tilboð. Hann vill reyna að komast í liðið. Ég sé leikmann sem hefur verið óheppinn með meiðsli í gegnum árin,“ sagði Sinclair við talkSPORT.

„Það er ekkert slæmt við hann, hann er góður atvinnumaður og veldur engum vandræðum. Afhverju í ósköpunum myndi hann hafna samningi við Manchester United. Það má bara gagnrýna fólkið sem bauð honum þennan samning.“

„Það er fáránlegt að Rio gagnrýni hann og segi honum að hann eigi að yfirgefa klúbbinn þar sem hann sé að taka tækifæri frá ungum leikmönnum. Ég er ekki sáttur við Rio, hann fór yfir strikið þarna.“