Bacary Sagna, fyrrum leikmaður Arsenal, er ekki hrifinn af kaupstefnu félagsins í sumar.
Arsenal hefur keypt þá Ben White, Albert Lokonga, Nuno Tavares, Aaron Ramsdale og Martin Ödegaard til félagsins í sumar. Upphæðin er talin nema um 140-150 milljónum punda.
Þrátt fyrir mikla eyðslu má segja að enginn af ofantöldum leikmönnum hafi sannað sig á allra stærsta sviði fótboltans.
,,Hvernig getur þú eytt 150 milljónum punda í aðeins unga leikmenn? Það er kannski gott fyrir framtíðina en það verður einhver að hugsa um nútíðina. Þegar ég var að spila hefðu allir verið spenntir fyrir því að spila fyrir Arsenal. Við höfum tapað DNA okkar,“ sagði Sagna. Hann lék með Arsenal á árunum 2007 til 2014.
Skytturnar hafa alls ekki byrjað leiktíðina í ensku úrvalsdeildinni vel. Liðið hefur tapað báðum leikjum sínum hingað til, gegn Brentford og Chelsea. Arsenal á enn eftir að skora mark.
