Katrín Jakobsdóttir, forsætisráðherra kveðst hafa gleymt því hvernig sóttvarnareglur landsins virkar þegar hún mætti á knattspyrnuleik í gær. KR vann 6-0 stórsigur á Víking R. í Vesturbænum í Lengjudeild kvenna í gær en Katrín var á meðal þeirra sem mættu á völlinn. Það kemur fram á Fótbolta.net.

Eins og knattspyrnuáhugafólk veit er grímuskylda á knattspyrnuvöllum landsins, eitthvað sem ekki tíðkast í öðrum löndum. Katrín gleymdi þeim reglum sem ríkja hér á landi.

Þær Aiden Hogan Keane, Unnur Elva Traustadóttir, Kristín Sverrisdóttir og Bergdís Fanney Einarsdóttir höfðu komið KR-ingum í 4-0 forystu í fyrri hálfleik. Sandra Dögg Bjarnadóttir og Karítas Ingvadóttir bættu við fimmta og sjötta markinu á 65. og 85 mínútu. KR er í 3. sæti deildarinnar með 33 stig eftir 15 leiki, tveimur stigum frá FH í efsta sæti. Víkingur R. er í 4. sæti með 22 stig.

Katrín sem fer fyrir ríkisstjórninni sem setur hömlur á líf fólks vegna COVID 19 faraldursins gleymdi eigin reglum þegar hún mætti á völlinn í gær. „Forsætisráðherrann Katrín Jakobsdóttir átti heldur ekki góðan dag þar sem hún mætti á völlinn en gleymdi grímunni,“ segir í umfjöllun Fótbolta.net um Katrínu.

„Ég hreinlega ætla að viðurkenna að mig misminnti,“ segir Katrín við RÚV.

„Ég taldi satt að segja að íþróttaviðburðir utandyra þar sem fjarlægð er tryggð, og hún var algjörlega tryggð á þessum leik þar sem voru ekki sérlega margir gestir og við vorum utandyra, þá minnti mig hreinlega að það væri ekki grímuskylda á íþróttaviðburðum utandyra. Það var misminni og mér þykir mjög leiðinlegt að hafa brotið reglur með þessum hætti.“

„Ég var grímulaus í góðri trú og taldi að þar sem langt var á milli mín og næstu manna og við vorum utandyra að ég væri að gera rétt. Ég er mannleg eins og aðrir og hefði betur flett upp á covid.is fyrir leikinn.“