Sean Dyche stjóri Burnley vonast til þess að félagið geti bætt við sig leikmönnum áður en félagaskiptaglugginn lokar í lok ágúst.
Burnley hefur lítið bætt við hóp sinn í sumar en leikmannahópur Burnley er þunnskipaður og gæti það orðið til vandræða þegar líða tekur á tímabilið.
Dyche var í stuði þegar hann ræddi málið við fréttamenn í dag. „Við vorum nálægt því að krækja í Messi, við vorum svekktir að missa af því en hann hafði talað um ást sína á okkur. Ronaldo er að leita að liði en fyrir utan það þá sjáum við hvað gerist. Lewandowski sagðist ekki vera á leið hingað en hinir hafa gert það,“ sagði Dyche léttur.
„Félagið er að reyna að hamra járnið, þetta snýst í enda dagsins um peninga. Ef þú borgar ekki uppsett verð þá færðu ekki leikmennina. Við bíðum og sjáum, við gætum séð leikmenn koma sem geta bætt sig og bætt hóp okkar.“
„Við héldum í okkar mikilvægu leikmenn, þrátt fyrir sögusagnir sem halda bara áfram þá er þetta sami hópur. Við viljum bæta við hópinn en halda í okkar lykilmenn.“
Jóhann Berg Guðmundsson er í leikmannahópi Burnley og var í byrjunarliði liðsins í fyrstu umferð ensku úrvalsdeildarinnar.
