Jordan Henderson fyrirliði Liverpool hefur boðað alla fyrirliða í ensku úrvalsdeildinni á fund sinn á morgun. Ástæðan er Ofurdeildin sem rætt er um þessa dagana.

Henderson var sterkur í að tengja menn saman og ræða málin þegar COVID-19 veiran skall á, í gegnum Henderson og aðra fyrirliða var sterk samstaða á meðal leikmanna í ensku úrvalsdeildinni.

Sex ensk félög stefna á þáttöku í Ofurdeildinni og komu að stofnun hennar, deildin er gríðarlega umdeild og hafa félögin sem koma að henni setið undir hótunum síðustu daga.

Enska úrvalsdeildin fundaði í dag en aðeins fjórtán félög fengu boð á fundinn, félögin sex sem koma að Ofurdeildini fengu ekki að taka þátt í fundinum.

Að fundi loknum kom fram yfirlýsing þar sem kom fram að félögin 14 hafni þessari deild og að allt verði gert til þess að koma í veg fyrir að hún fari í loftið.

12 evrópsk stórlið á knattspyrnusviðinu tilkynntu seint á sunnudagskvöld að þau hafi tekið saman höndum um stofnun Ofurdeildar, The Super League. UEFA er alfarið á móti þessu og hótaði í gær að útiloka liðin og leikmenn þeirra frá þátttöku í öllum mótum á alþjóðasviðinu. Þá hafa knattspyrnusamböndin í Englandi, Spáni og á Ítalíu hótað að reka liðin úr deildarkeppnunum þar í landi. Markmiðið með deildinni er að til verði keppni þar sem 15 lið eiga alltaf fast sæti en árlega fái 5 önnur lið aðgang að keppninni.

Þessi nýja deild hefur mætt mikilli mótspyrnu en svo virðist sem félögin ætli að standa fast á sínu og hefja leik í deildinni sem allra fyrst.

Stofnfélög deildarinnar eru:
Arsenal
Chelsea
Liverpool
Manchester City
Manchester United
Tottenham
Atlético Madrid
Barcelona
Real Madrid
AC Milan
Inter Milan
Juventus.