Ole Gunnar Solskjær stjóri Manchester United hefur keypt hlut í ULTI sem er umboðsskrifstofa fyrir rafíþróttafólk í Noregi.
ULTI er nýleg stofa en hún er með fimmtán leikmenn og einn þjálfara á sínum snærum. Fyrirtækið hefur frá byrjun þénað nokkuð vel.
Asgeir Kvalvik stofnandi ULTI er frá Kristansund í Noregi en þaðan er stjóri Manchester United einnig. Solskjær ásamt Jim Solbakken, umboðsmanni sínum keyptu stóran hlut í fyrirtækinu. Báðir eiga nú 12,5 prósent.
Rafíþróttir er vaxandi grein en fremsta rafíþróttafólk í heimi er byrjað að þéna verulegar upphæðir. Solskjær sér mikil tækifæri í þessum iðnaði.
„Rafíþróttir hafa stækkað miklu meira en nokkur þorði að spá fyrir um, mér finnst þetta spennandi. ULTI er fyrirtæki með stór markmið,“ sagði Solskjær um málið.
Solskjær var duglegur að spila Manager tölvuleikina þegar hann var leikmaður Mancehster United og segir að það hafi hjálpað sér á lífsins leið.
