Sigur Manchester United á Tottenham í gær var eflaust sætari fyrir Luke Shaw bakvörð United frekar en nokkurn annan. Tottenham tók á móti Manchester United í ensku úrvalsdeildinni í gær. Leiknum lauk með 3-1 sigri Manchester United en leikið var á heimavelli Tottenham í Lundúnum.
Jose Mourinho er stjóri Tottenham en hann stýrði United í rúm tvö ár, frá árinu 2016. Hann kunni ekki vel við Shaw og var ansi duglegur að gera lítið úr honum við fjölmiðla.
Shaw hefur á þessu tímabili sannað ágæti sitt og verið einn allra besti leikmaður United, Ole Gunnar Solskjær hefur blásið lífi í vinstri bakvörðinn.
„Það er erfitt fyrir hann að vera á bekknum, ég get ekki borið hann saman við Ashley Young, Darmian eða Blind,“ sagði Mourinho um Shaw þegar hann var stjóri United og Shaw var utan hóps.
Ashley Young, Matteo Darmian og Daley Blind voru allir seldir frá United en Shaw hefur slegið í gegn.
„Ég get ekki borið hann saman við þá, hvernig hann æfir, hvernig hann leggur sig fram í verkefnin, einbeitingin eða metnaðinn. Ég get ekki borið það saman við þá.“
The Luke Shawshank Redemption. pic.twitter.com/ymafq6se6z
— ESPN UK (@ESPNUK) April 12, 2021
