Aston Villa tók á móti Fulham í ensku úrvalsdeildinni í dag. Heimamenn voru lengi í gang en unnu að lokum góðan sigur.
Fyrri hálfleikur var fremur rólegur og lítið um góð færi. Þegar að hálfleikurinn var við það að klárast dæmdi dómarinn vítaspyrnu eftir að Mario Lemina virtist hafa brotið á Ollie Watkins innnan vítateigs. Myndbandsdómgæslan sneri dómnum hins vegar við þar sem komist var að þeirri niðurstöðu að Lemina hafi fyrst náð til boltans. Staðan í hálfleik 0-0.
Eftir um stundarfjórðung í síðari hálfleik kom Serbinn Aleksandar Mitrovic Fulham yfir þegar hann nýtti sér mistök í vörn Villa.
Allt saman leit nokkuð vel út fyrir gestina þar til Trezeguet jafnaði metin fyrir Villa eftir fyrirgjöf frá Tyrone Mings.
Örfáum mínútum seinna var staðan orðin 2-1 fyrir Villa. Aftur var Trezeguet á ferðinni. Keinan Davis átti stoðsendinguna en hann hafði nýtt sér mistök Tosin Adarabioyo í vörn Fulham.
Ollie Watkins innsiglaði svo endurkomusigur Villa þegar hann skoraði eftir sendingu frá Bertrand Traore. Lokatölur 3-1.
Aston Villa er eftir leikinn í 9.sæti með 44 stig. Fulham er í fallsæti með 26 stig, þremur stigum frá öruggu sæti. Þeir hafa spilað leik meira en Newcastle, sem er í sætinu fyrir ofan, svo útlitið er ekki gott fyrir þá.
