Rosengard tók á móti austurríska liðinu St.Pölten í Meistaradeild Evrópu í kvöld. Leikurinn endaði með 2-2 jafntefli en leikið var í Svíþjóð.
Glódís Perla Viggósdóttir var á sínum stað í varnarlínu Rosengard í leiknum og spilaði allan leikinn. Kristrún Antonsdóttir var á meðal varamanna St.Pölten en kom inn á 75. mínútu.
Mateja Zver, fyrrum leikmaður Þórs/Ka, kom St.Pölten yfir með marki á 21. mínútu. Hún var síðan aftur á ferðinni á 46. mínútu er hún tvöfaldaði forystu St.Pölten.
Leikmenn Rosengard lögðu hins vegar ekki árar í bát. Sanne Troelsgaard, minnkaði muninn fyrir liðið með marki á 68. mínútu.
Það var síðan Caroline Seger sem jafnaði leikinn fyrir Rosengard með marki á 90. mínútu.
Fleiri mörk voru ekki skoruð í leiknum sem endaði með 2-2 jafntefli. Seinni leikur liðanna fer fram í næstu viku.
