Karl-Heinz Rummenigge stjórnarformaður FC Bayern hefur látið vita af því að félagið væri til í að fá Mohamed Salah til félagsins frá Liverpool.
Salah hefur verið magnaður fyrir Liverpool frá því að hann gekk í raðir félagsins árið 2017. Salah hefur undanfarið rætt um samningamál sín en hann er sagður vilja hærri laun.
Salah mun í sumar aðeins eiga tvö ár eftir af samningi sínum og gæti sú staða komið upp í sumar að Liverpool skoði það að selja hann, náist ekki samkomulag um kaup og kjör til framtíðar.
„Það er ekki í plönum okkar að Kaupa Salah en það væri heiður fyrir okkur að fá hann,“ sagði Rummenigge.
„Salah er Messi þeirra í Afríku, hann hefur hæfileikana til að spila fyrir eitt besta félag í heimi. Salah getur mátað afrek sín við Messi og Ronaldo.“
