Ragnar Bragi Sveinsson fyrirliði Fylkis var fluttur með sjúkrabíl af vellinum í Garðabæ á mánudag eftir samstuð við Daníel Laxdal seint í fyrri hálfleik. Ragnar tví kinnbeinsbrotnaði og fór í aðgerð vegna þess í gær.
Ólafur Ingi Skúlason aðstoðarþjálfari liðsins steig fram í gær og svaraði fyrir rauða spjaldið sem hann fékk og brotið á Ragnar. Ólafur fékk rautt spjald fyrir grófa tæklingu seint í leiknum og var óhress með að ekkert hafi verið gert í broti Daníels.
„Þegar ég lendi í þessu samstuði þá hugsaði ég ekkert meira út í það, ég sá þetta ekki aftur fyrr en daginn eftir. Ég man eftir öllu, þegar ég sá þetta morguninn eftir og svo rauða spjaldið á Óla þá fer maður að hugsa. Ég velti því fyrir mér ef ég hefði verið að sparka í boltann og Daníel hefði komið svona seint inn í mig, þá hefði kannski eitthvað verið gert. Ég er ekki að segja að Daníel Laxdal hafi verið að reyna þetta en hann var of seinn í návígið, fastur fyrir. Það hefði nú alveg mátt taka þessu,“ sagði Ragnar Bragi í samtali við blaðamann í morgun.
Ragnar var fljótur að átta sig á því að beinið í andliti hans væri brotið. „Ég finn það þegar ég kem við andlitið að beinið er bara inn.“
Þessi öflugi fyrirliði Fylkis var fluttur á sjúkrahús. „Ég fer beint í myndatöku og svo kemur sérfræðingur að tala við mig, ég er bara sendur heim og þurfti að bíða. Ég gisti bara heima og fór ekki í aðgerðina fyrr en í gær. Hún frestaðist eitthvað.“
„Þeir eru að tala um að ég verði frá í fimm eða sex vikur, það fer allt eftir því hvernig þetta grær. Þetta er ógeðslega fúlt, maður er búinn að harka í allan vetur og var spenntur fyrir nýju hlutverki og nýrri stöðu á vellinum. Þetta eru bara sex vikur og bara áfram gakk.“
Höggið sem Ragnar fékk hefur haft áhrif á hann. „Ég er búinn að vera hálf sofandi bara, ég er mikið verkjaður. Ég hef ekki lent í svona meiðslum áður, ég á að hvíla mig eins og ég get. Ég hef ekkert verið í vinnu, ég er með verkjalyf til að stilla mig af.“
Læknar tjáðu Ragnar eftir myndatöku á sjúkrahúsinu að hann mætti þakka fyrir að ekki fór verr. „Ég fæ að heyra frá lækninum að ég sé heppin að höggið hafi ekki komið ofar, þremur sentimetrum ofar og þetta fer beint á gagnaugað. Mér skilst að það sé stórhættulegur staður, það er því heppni að ekki fór verr.“
