PUMA hefur staðfest stóran samning við KSÍ, þetta var staðfest í fréttatilkynningu nú í morgun.

Skömmu síðar fóru að leka myndir af treyjunni á veraldarvefinn en Puma virðist hafa birt treyjuna fyrir slysni. Búninginn átti að frumsýna í júlí þegar fundur um málið átti að vera. Puma hefur eytt myndunum af vefsíðu sinni en þær má enn finna á Google.

Málið kom KSÍ í opna skjöldu enda hefur vinnan við nýtt merki á treyjunni verið í vinnslu um langt skeið og átti að frumsýna það ásamt nýjum búningi í næsta mánuði.

„Púma er risafyrirtæki, einn af stærstu íþróttavöruframleiðendum heims, og það voru greinilega einhver mistök þar innanhús hjá þeim. Við hefðum viljað gera þetta öðruvísi, og ætluðum að segja söguna og útskýra þetta allt betur í sumar,“ segir Klara Bjartmarz framkvæmdarstjóri KSÍ við Viðskiptablaðið.

KSÍ skoðar hvernig kynning og annað á treyjunni verður. „Við ætlum að gefa okkur smá tíma í það, fá okkur kaffisopa og ráða ráðum okkar með framhaldið.“

Klara segir að unnið hafi verið að nýja merkinu um langt skeið. „Það er margra mánaða, ef ekki ára, vinna þarna á bakvið, og mikil saga sem við ætluðum að segja og ýmsar útgáfur sem við ætluðum að kynna, og ætlum enn að gera.“

Merkið má sjá hér að neðan.