„Sláandi munur er á heildarlaunum þjálfara kvenna hjá Stjörnunni. Munurinn er fjórfaldur í fótboltanum en handboltinn slær í helmingsmun,“ segir í ítarlegri frétt sem Benedikt Bóas Hinriksson skrifar í Fréttablaðið í dag um árskýrslu Stjörnunnar.

Stjarnan greiddi leikmönnum sínum í Pepsi Max deild karla tæpar 84 milljónir króna í laun á síðasta ári. Kostnaðurinn við Rúnar Pál Sigmundsson og þjálfarateymi hans á síðasta ári var um 40 milljónir.

Kvennalið Stjörnunnar sem einnnig leikur í efstu deild fékk 5,5 milljónir í laun en kostnaður við þjálfarateymið var 11 milljónir. Meistaraflokkur karla var rekinn með 16 milljóna króna tapi en stelpurnar voru réttu megin við núllið.

Harpa Þorsteinsdóttir var lengi vel skærasta stjarna Stjörnunnar í kvennaflokki. „Auðvitað er sláandi að sjá svona svart á hvítu þennan launamun og einnig launakostnað í þjálfaramálum. Það er munur á rekstri deildanna og eru kannski eðlilegar skýringar á því að einhverju leyti, en það er samt þessi munur og viðhorfið gagnvart kvennaboltanum sem skiptir miklu máli í öllu starfinu. Ég tel að svona gagnsæi sé gott og jákvætt að fólk spái aðeins í þessu þegar það horfir á stóru myndina,“ sagði Harpa í samtali við Fréttablaðið.