Enska úrvalsdeildin skoðar það nú að læsa leikmenn inni á hótelum í mánuð til að ljúka deildinni, þetta segir enska blaðið Mirror.

Enska úrvalsdeildin ætlar að gera allt til þess að klára deildina sem nú er í pásu vegna kórónuveirunnar.

Mikið er í húfi fyrir deildina en tekjutapið gæti verið 750 milljónir punda ef ekki tekst að klára deildina. Leikirnir færu þá fram fyrir luktum dyrum.

Enska úrvalsdeildin vonar að kórónuveirufaraldurinn hægi á sér á Englandi eftir þrjár vikur.

Allir sem koma að deildinni gætu verið sendir í sóttkví á hóteli og myndu vera þar þangað til deildin er á enda. Horft er á að klára deildina fyrir 12 júlí ef grípa þarf í þessa aðgerð.